ກ່ຽວກັບອຸທິຍານ

ກ່ຽວກັບອຸທິຍານແຫ່ງຊາດ ຫີນໜາມໜໍ່

ຍິນດີຕ້ອນຮັບທຸກທ່ານເຂົ້າສູ່ອຸທິຍານແຫ່ງຊາດ ຫີນໜາມໜໍ່ ສິ່ງມະຫັດສະຈັນທາງທໍາມະຊາດ, ມີພື້ນທີ່ທັງໝົດ 94,121 ເຮັກຕາ ຕັ້ງຢູ່ ທິດຕາເວັນອອກສ່ຽງໃຕ້ຂອງປະເທດລາວ ເຂດພື້ນທີ່ອະນຸລັກ ທີ່ສວຍສົດງົດງາມໜ້າປະທັບໃຈແຫ່ງນີ້ເປັນຖິ່ນທີ່ຢູ່ອາໄສທີ່ສໍາຄັນ ຂອງຊີວະນາໆພັນຫຼາກຫຼາຍຊະນິດ ແລະ ບາງຊະນິດໃກ້ສູນພັນທີ່ມີລັກສະນະໂດດເດັ່ນລືກລັບທີ່ສຸດຢູ່ໃນໂລກ ແລະ ກໍເປັນແຫຼ່ງກໍາເນີດຂອງລະບົບນິເວດທໍາມະຊາດທີ່ຫຼາກຫຼາຍ ລວມທັງປ່າໄມ້ດົງດິບດັ່ງເດີມທີ່ອຸດົມສົມບູນ, ນໍ້າຕົກຕາດທີ່ສວຍງາມ ແລະ ລະບົບນິເວດຖໍ້າທີ່ມີຄວາມສະຫຼັບຊັບຊ້ອນເປັນຕົ້ນແມ່ນ ຖໍ້ານໍ້າລອດເຊບັ້ງໄຟ ເຊິ່ງເປັນຖໍ້າພູຫີນປູນທີ່ກວ້າງໃຫຍ່ທີ່ສຸດແຫ່ງໜຶ່ງຂອງໂລກ ທີ່ມີສາຍນໍ້າໄຫຼລອດຜ່ານທຸກລະດູການ.​ ອຸທິຍານແຫ່ງຊາດ ຫີນໜາມໜໍ່ ຕັ້ງຢູ່ພາກກາງຂອງສາຍພູຫຼວງໃນເຂດພື້ນທີ່ມີພູຫີນປູນສູງຊັນຈໍານວນຫຼາຍ ແລະ ເປັນເຂດຊາຍແດນລະຫວ່າງ ສປປ ລາວ ກັບ ປະເທດ ສສ ຫວຽດນາມ ໂດຍມີຂອບເຂດຊາຍແດນທາງທິດຕາເວັນອອກຕິດກັບອຸທິຍານແຫ່ງຊາດ ຟອງຍາ-ແກບາງ ພື້ນທີ່ມໍລະດົກໂລກທາງດ້ານທໍາມະຊາດໃນປະເທດຫວຽດນາມ ແລະ ເມື່ອເຂດພື້ນທີ່ອະນຸລັກທັງສອງແຫ່ງນີ້ລວມເຂົ້າກັນຈະກາຍເປັນພູມິທັດພູຫີນປູນຂະໜາດໃຫຍ່ທີ່ສຸດໃນ ໂລກ.

ຄໍາວ່າ “ຫີນໜາມໜໍ່” ແປວ່າ “ພູຫີນປູນທີ່ມີຍອດແຫຼມຄົມຄ້າຍຄືກັບໜໍ່ໄມ້” ເຊິ່ງໝາຍເຖິງພູມີທັດຂອງປ່າພູຫີນປູນທີ່ສູງຊັນທີ່ມີຍອດແຫຼມຄົມອັນເປັນເອກະລັກສະເພາະໂດດເດັ່ນທີ່ເກີດຂື້ນຈາກຂະບວນການວິວັດທະນາການທາງດ້ານທໍລະນີວິທະຍາ ເປັນເວລາ 300 ລ້ານປີ.

ມາຮອດປັດຈຸບັນ ມີການຄົ້ນພົບຖໍ້າຈໍານວນ 173 ແຫ່ງ ພ້ອມກັບໜ້າຜາສູງຊັນເຖິງ 300 ແມັດ ຢູ່ໃນເຂດຂອງອຸທິຍານ ເຊິ່ງກໍ່ໃຫ້ເກີດເປັນແຫຼ່ງຖິ່ນທີ່ຢູ່ອາໄສທີ່ມີຄວາມປອດໄພສຳລັບສັດປ່າຫຼາຍຊະນິດທີ່ມີວິວັດທະນາການເຕີບໃຫ່ຍທີ່ແຕກຕ່າງກັບປະຊາກອນສັດປ່າ ກຸ່ມອື່ນໆ.

ດັ່ງນັ້ນ ລັກສະນະອັນໂດດເດັ່ນສະເພາະຂອງອຸທິຍານແຫ່ງຊາດ ຫີນໜາມໜໍ່ຢ່າງໜຶ່ງກໍ່ຄື ລະດັບຄວາມຫຼາກຫຼາຍຂອງຊີວະນາໆພັນສູງ ແລະ ມັນເປັນບ່ອນເພິ່ງພາອາໄສໃຫ້ກັບຈໍາພວກສັດຈໍານວນຫຼວງຫຼາຍ ພ້ອມທັງມີຫຼາຍຊະ ນິດພັນທີ່ບໍ່ມີການຄົ້ນພົບອີກແລ້ວໃນທົ່ວໂລກ ລວມທັງຊະນິດພັນນົກ, ສັດລ້ຽງລູກດ້ວຍນໍ້ານົມ, ສັດເລືອຄານ ແລະ ພືດແປກຕາຫາຍາກ ເຊິ່ງເຮັດໃຫ້ສິ່ງເຫຼົ່ານີ້ກາຍເປັນຊັບສົມບັດທາງທໍາມະຊາດຢ່າງແທ້ຈິງຂອງອຸທິຍານ.

            ອຸທິຍານ​ແຫ່ງນີ້ ບໍ່ພຽງແຕ່ເປັນສະຖານທີ່ມະຫັດສະຈັນທາງທໍາມະຊາດເທົ່ານັ້ນ ​ມັນຍັງເປັນສະຖານທີ່ ທີ່ມີຄຸນຄ່າຄວາມສໍາຄັນທາງດ້ານວັດທະນະທໍາ ແລະ ປະຫວັດສາດອີກດ້ວຍ ພ້ອມກັບເປັນທີ່ຢູ່ອາໄສຂອງປະຊາຊົນກຸ່ມຊົນເຜົ່າຈໍານວນຫຼາຍ ເຊິ່ງແຕ່ລະກຸ່ມຊົນເຜົ່າໃນພື້ນທີ່ກໍມີຮີດຄອງປະເພນີ ແລະ ວິຖີຊີວິດທີ່ເປັນເອກະລັກສະເພາະຂອງຕົນເອງ. ດັ່ງນັ້ນ ພວກເຮົາຂໍເຊີນທ່ານມາທ່ຽວຊົມ ແລະ ສໍາພັດກັບສາຍພົວພັນອັນແໜ້ນແຟ້ນລະຫວ່າງປະຊາຊົນ ກັບ ທໍາມະຊາດ ເພື່ອຮ່ວມກັນເປັນສັກຂີພະຍານໃຫ້ກັບມໍລະດົກທາງດ້ານວັດທະນະທໍາອັນຍາວ​ນານ ຂອງຊຸ່ມຊົນທ້ອງຖິ່ນຂອງອຸທິຍານແຫ່ງ ຫີນໜາມໜໍ່ນໍາກັນ!