ຖໍ້ານໍ້າລອດເຊບັ້ງໄຟ ແມ່ນສະຖານທີ່ທ່ອງທ່ຽວຫຼັກທີ່ສໍາຄັນຂອງອຸທິຍານແຫ່ງຊາດ ຫີນໜາມໜໍ່ ເຊິ່ງໃນເມື່ອກ່ອນ ຊາວບ້ານເຄີຍເຊື່ອຖືກັນວ່າຖໍ້າແຫ່ງນີ້ເປັນແຫຼ່ງກໍາເນີດຂອງສາຍນໍ້າເຊບັ້ງໄຟ ແລະ ເປັນທີ່ຢູ່ອາໄສຂອງສິ່ງສັກສິດທີ່ຄອຍໃຫ້ຄວາມຊ່ວຍເຫຼືອ ແລະ ປົກປັກຮັກສາຊາວບ້ານທີ່ເຂົ້າໄປຊອກຫາເຈຍ ແລະ ເກັບຮັງນົກແອ່ນພາຍໃນຖໍ້າ. ຖໍ້ານີ້ມີຄວາມຍາວເກືອບ 12 ກິໂລແມັດ, ສູງປະມານ 76 ແມັດ ແລະ ກວ້າງປະມານ 56 ແມັດ ເປັນຖໍ້າຂະໜາດໃຫຍ່ທີ່ສຸດແຫ່ງໜຶ່ງຂອງໂລກທີ່ມີສາຍນໍ້າໄຫຼລອດຜ່ານ ພ້ອມກັບໂຄງສ້າງພາໃນຂະໜາດໃຫຍ່ທີ່ມີສະຖາປັດຍະກໍາການຕົກແຕ່ງອັນສວຍສົດງົດງາມຂອງທໍາມະຊາດ.

ກຸ່ມບໍລິການນໍາທ່ຽວເຮືອບ້ານ ໜອງປີງ ມີບໍລິການນໍາພາທ່ຽວຖໍ້າດ້ວຍເຮືອພາຍສໍາລັບນັກທ່ອງທ່ຽວເຂົ້າໄປທ່ຽວຊົມພາຍໃນຖໍ້າປະມານ 1 ຊົ່ວໂມງເຄິ່ງ ຮອດຈຸດທີ່ທ່ານສາມາດຍ່າງໄຕ່ຂຶ້ນດ້ານໜຶ່ງຂອງໂຖ່ງຖໍ້າຈົນເຖິງລະບຽງຖໍ້າສູງ ທີ່ສາມາດເບິ່ງເຫັນກ້ອນຫີນຂະໜາດໃຫຍ່ທີ່ຕັ້ງຢູ່ທາງເຂົ້າປາກຖໍ້າ.

ສໍາລັບນັກທ່ອງທ່ຽວທີ່ຕ້ອງການຊອກຫາປະສົບການທ່ອງທ່ຽວແບບປະຈົນໄພ ທາງບໍລິສັດທ່ອງທ່ຽວ ກຣີນດິສໂຄເວຣີ ມີບໍລິການນໍາພາທ່ອງທ່ຽວຖໍ້າດວ້ຍເຮືອຄາຍັກ ພ້ອມກັບການຕັ້ງແຄັມນອນປ່າ ແລະ ການເດີນປ່າ ຫຼື ໄປສູ່ປາກຖໍ້າດ້ານເທິງ (ລາຍລະອຽດເບິ່ງເວັບໄຊຂອງບໍລິສັດ: https://greendiscoverylaos.com/).

ໃນເມື່ອເວລາເຂົ້າທ່ຽວຊົມຖໍ້ານໍ້າລອດເຊບັ້ງໄຟ ທ່ານສາມາດນອນພັກຢູ່ບັງກະໂລແສນສະບາຍໃນສະຖານທີ່ຕັ້ງແຄັມຂອງບ້ານ ໜອງປີງທີ່ຫາກໍເປີດໃຫ້ບໍລິການໃໝ່ ຫຼື ກາງ​ເຕັ້ນນອນຕິດກັບຫາດຊາຍຕາມແຄມນໍ້າທີ່ອ້ອມຮອບ ດ້ວຍພູຫີນປູນ.

ວິທີການເດີນທາງໄປຖໍ້ານໍ້າລອດເຊບັ້ງໄຟທີ່ດີສຸດຄື ການຂີ່ເຮືອຫາງຍາວຈາກບ້ານ ປາກພະນັງ ໄປຫາ ພື້ນທີ່ປາກຖໍ້ານໍ້າລອດເຊບັ້ງໄຟ ບ້ານ ໜອງປີງ ເພາະມັນເປັນການນັ່ງພັກຜ່ອນໄປພ້ອມກັບການຊົມທິວທັດທໍາມະຊາດພູຜາປ່າດົງ, ທົ່ງນາ ແລະ ຄວາຍລຽບຕາມສາຍນໍ້າພະນັງ ແລະ ເຊບັ້ງໄຟ ໂດຍໃຊ້ເວລາປະມານ 1 ຊົ່ວໂມງເຄິ່ງ.

ສໍາລັບການເດີນທາງດ້ວຍລົດຈັກ ທ່ານສາມາດຝາກລົດຈັກໄວ້ໃນສະຖານທີ່ປອດໄພໃນບ້ານ ປາກພະນັງ ແລ້ວສືບຕໍ່ເດີນທາງດ້ວຍເຮືອຫາງ​ຍາວ​ຂອງຊາວບ້ານ ໄປສູ່ຖໍ້ານໍ້າລອດເຊບັ້ງໄຟ ແລະ ເດີນທາງກັບພາຍໃນມື້ດຽວກັນ ຫຼື ມື້ຖັດໄປກໍໄດ້ເພື່ອທ່ອງທ່ຽວຕໍ່. ອີກທາງເລືອກໜຶ່ງກໍຄື ທ່ານສາມາດເອົາລົດຈັກຂື້ນເຮືອຫາງຍາວຂອງຊາວບ້ານໄປພ້ອມກັນ ເພື່ອເບິ່ງຊົມບັນຍາກາດໃນບ້ານ ໜອງປີງ.

ນອກຈາກ ການເດີນທາງດ້ວຍເຮືອແລ້ວ ທ່ານກໍສາມາດຂີ່ລົດຕາມເສັ້ນທາງໄປສູ່ບ້ານໜອງປີງໄດ້ໂດຍໃຊ້ບໍລິການເຮືອບັກຂ້າມນໍ້າເຊ ແລະ ສືບຕໍ່ຂັບລົດເດີນທາງໄປອີກ 30 ກິໂລແມັດ.

ສາຍຫ້ວຍຮຸກໄຫຼຜ່ານຖໍ້າ 3 ແຫ່ງໃນເຂດພື້ນທີ່ປ່າຕົ້ນນໍ້າຂອງບ້ານ ທົ່ງຊໍາ ແລະ ມີເສັ້ນທາງຍ່າງຫຼາຍ ເສັ້ນທີ່ສາມາດຍ່າງຈາກບ້ານເຂົ້າໄປໃນພື້ນທີ່ຂອງປ່າດົງດິບ ແລະ ຜ່ານພື້ນທີ່ພູຫີນປູນຂອງອຸທິຍານແຫ່ງຊາດ.

ການຍ່າງເດີນປ່າຕາມເສັ້ນທາງທີ່ຂ້ອນຂ້າງຍາກເຫຼົ່ານີ້ ນໍາພາທ່ານໄປຮອດຖໍ້າປາກຖໍ້າ (ຖໍ້າທີ 1) ເປັນຖໍ້າຂະໜາດນ້ອຍເຕັມໄປດ້ວຍນໍ້າທີ່ເໝາະສົມກັບການລອຍ ເຊິ່ງປະຊາຊົນທ້ອງຖິ່ນບອກວ່າມີກຸ້ງຂະໜາດໃຫຍ່ອາໄສຢູ່ໃນວັງນໍ້າເລີກພາຍໃນຖໍ້າ ແລະ ສືບຕໍ່ຍ່າງໄປທິດເໜືອກໍຈະໄປຮອດຖໍ້ານົກແອ່ນ (ຖໍ້າທີ 2) ເຊິ່ງຖໍ້ານີ້ຕັ້ງຊື່ຕາມຊື່ຂອງນົກແອ່ນ ເຊິ່ງທ່ານສາມາດສັງເກດເຫັນພວກມັນ ແລະ ເຈຍບິນໃນບໍລິເວນຖໍ້າ ພາຍໃນຖໍ້ານີ້ມີພື້ນທີ່ກວ້າງທີ່ສາມາດຮັບແສງສະຫວ່າງຈາກຂ້າງນອກເຄີຍເປັນທີ່ພັກອາໄສຂອງທະຫານຫວຽດນາມເໜືອ

ປະມານ 3,000 ສະຫາຍ ແລະ ຊາວບ້ານໃນທ້ອງຖິ່ນໃນຊ່ວງສະໄໝສົມຄາມ. ຈຸດສຸດທ້າຍຂອງການຍ່າງປ່ານີ້ ທ່ານກໍຈະຮອດຖໍ້ານໍ້າອອກ (ຖໍ້າທີ 3) ເຊິ່ງເປັນຈຸດພົບເຫັນສາຍຫ້ວຍທີ່ມີນໍ້າໄຫຼອີກຄັ້ງ ແລະ ເບິ່ງເພດານຫີນສວຍງາມຂອງຖ້ໍາ ພ້ອມກັບຮ່ອງຮ່ອຍຂອງສັດປ່າຕາມພື້ນຜິວດິນຊາຍ ຖ້າໂຊກດີ ທ່ານກໍຈະພົບເຫັນໂຄ່ງດໍາຢູ່ຕາມໜ້າຜາທີ່ຢູ່ໃກ້ກັບຖໍ້າໃນເວລາພວກມັນໄຕ່ລົງຕາມໜ້າຜາກີນນໍ້າໃນກວນຕາລີ (ອ່າງນໍ້າຂະໜາດນ້ອຍຕາມໜ້າຜາ) ຫຼື ກິນອາຫານຕາມຕົ້ນໄມ້ໃນຊ່ວງຕອນເຊົ້າ ຫຼື ຕອນແລງ.  ການບໍລິການນໍາພາຍ່າງປ່າທ່ຽວຊົມທໍາມະຊາດມີ ການບໍລິການນໍາທ່ຽວເຄິ່ງມື້, ໜຶ່ງມື້ເຕັມ (ເດີນທາງຕອນເຊົ້າໆ) ແລະ ບໍລິການນໍາທ່ຽວ 2 ມື້ 1 ຄືນ (ຕັ້ງແຄັມນອນປ່າ).

ທ່ານສາມາດເດີນທາງໄປທ່ຽວຊົມນໍ້າຕົກຕາດສຽງລື (ນໍ້າຕົກຕາດທີ່ມີສຽງດັງ) ຕັ້ງຢູ່ລະຫວ່າງເສັ້ນທາງ 7 ກິໂລແມັດຈາກຕົວເມືອງບົວລະພາ ຫາ ບ້ານ ໜອງປີງ ແລະ ຂັບລົດຕໍ່ໄປອີກ 4 ກິໂລແມັດຈາກເສັ້ນທາງຫຼັກໄປຈົນເຖິງຮ້ານອາຫານໃກ້ແຄມສາຍນໍ້າ ເຊິ່ງເປັນຈຸດທີ່ນັກທ່ອງທ່ຽວສາມາດຈອດພະຫະນະເດີນທາງໄດ້ ຈາກນັ້ນ ສືບຕໍ່ຍ່າງທ່ຽວຊົມພື້ນທີ່ປ່າດົງດິບທີ່ສະງົບປະມານ 30 ນາທີ ກ່ອນທີ່ຈະໄດ້ຍິນສຽງ ແລະ ເຫັນຄວາມງາມຂອງ ນໍ້າຕົກຕາດສູງ 80 ແມັດແຫ່ງນີ້.

ກິ່ວມູຢາ ເປັນທີ່ຮູ້ຈັກກັນດີວ່າເປັນຈຸດເລີ່ມຕົ້ນຂອງເສັ້ນທາງເຂົ້າສູ່ປະເທດລາວທີ່ມີຄວາມຍາວໄລຍະ 16,000 ກິໂລແມັດ ທີ່ເອີ້ນວ່າ ເສັ້ນທາງປະຫວັດສາດໂຮ​​​ຈິມິນ ໂດຍມີການຄາດຄະເນວ່າ 75% ການຂົນສົ່ງດ້ວຍລົດບັນທຸກລໍາລຽງຂອງທະຫານຫວຽດນາມເໜືອທັງໝົດທີ່ມຸ່ງໜ້າໄປສູ່ກອງກໍາລັງປະຕິວັດປົດປ່ອຍ ທະຫານຫວຽດນາມຢູ່ໃນພາກໃຕ້ໄດ້ພາກັນເດີນທາງຜ່ານຊ່ອງແຄບຂອງໜ່ວຍພູນີ້. 

ເຖິງແມ່ນວ່າ ບັນດາຫຼັກຖານທາງປະຫວັດສາດໃນອາດີດນັ້ນ ອາດຈະຫາເບິ່ງຍາກໃນປະຈຸບັນ ແຕ່ທ່ານຍັງຄົງພົບເຫັນຮ່ອງຮ່ອຍປະຫວັດສາດຂອງ “ສົງຄາມລັບ” ໃນບ້ານຕ່າງໆຕາມເສັ້ນທາງສາຍຫຼັກລະຫວ່າງບ້ານ ຫລັງຄັງ ຫາ ບ້ານ ປາກພະນັງ (ຈຸດຂີ່ເຮືອໄປຖໍ້ານໍ້າລອດເຊບັ້ງໄຟ) ແລະ ທ່ານກໍສາມາດເດີນທາງຈາກບ້ານ ຫລັງຄັງໄປສູ່ຊາຍແດນ ປະເທດຫວຽດນາມ ເພື່ອທ່ຽວຊົມທິວທັດທໍາມະຊາດອັນສວຍງາມຂອງກິ່ວມູຢາ ກ່ອນທີ່ຈະສຶບຕໍ່ເດີນທາງໄປບ້ານ ໜອງບົວ ເພື່ອຢ້ຽມຊົມຖໍ້າຕ່າງໆທີ່ເຄີຍນໍາໃຊ້ເປັນບ່ອນລີ້ໄພຂອງປະຊາຊົນທ້ອງຖິ່ນໃນຊ່ວງສົງຄາມ ແລະ ມ່ວນຊື່ນໄປກັບການເດີນທາງສູ່ນໍ້າຕົກຕາດສອງຊູ້.

ຈາກນັ້ນສືບຕໍ່ການເດີນທາງໄປສູ່ບ້ານ ຜານົບ ເຊິ່ງເປັນບ້ານທີ່ຕັ້ງຢູ່ບໍລິເວນແຄມຝັ່ງສາຍນໍ້າງໍ ເພື່ອທ່ຽວຊົມເບິ່ງຊາກເຄື່ອງບິນສູ້ຮົບສະໄໝສົງຄາມຂອງສະຫະລັດອາເມຣິກາທີ່ເກັບຮັກສາຢູ່ໃນວັດ ແລະ ປີກຂອງເຮືອບິນສູ້ຮົບລໍານີ້ໄດ້ຖືກນໍາໃຊ້ເປັນກະດານ​ສື່​ການ​ສອນ ຢູ່ໃນໂຮງຮຽນພາຍໃນບ້ານມາເປັນເວລາຫຼາຍປີແລ້ວໃນຊ່ວງລະຫວ່າງ ແລະ ຫຼັງສົງຄາມ.

ເດີນທາງໄປທາງທິດໃຕ້ຕໍ່ໄປສູ່ບ້ານ ວັງຄົນ ເພື່ອທ່ຽວຊົມໜຶ່ງໃນສະຖານທີ່ຖືກຖີ້ມລະເບີດຫຼາຍທີ່ສຸດຕາມເສັ້ນທາງໂຮຈິມິນ. ໃນຊ່ວງລະຫວ່າງການສູ້ຮົບຊາວບ້ານໄດ້ອົບພະຍົບອອກຈາກບ້ານໄປອາໄສຢູ່ໃນຖໍ້າທີ່ຫ່າງຈາກບ້ານຂອງພວກເຂົາໄປ 2 ກິໂລແມັດ ແລະ ພາຍຫຼັງສົງຄາມສິ້ນສຸດລົງ ພວກເຂົາກໍໄດ້ກັບມາຕັ້ງຖິ່ນຖານຢູ່ບ້ານເກົ່າ ເຊິ່ງປະຈຸບັນເປັນພື້ນທີ່ຂຸມລະເບີດຂະໜາດກວ້າງ ແລະ ພວກເຂົາກໍ່ນໍາໃຊ້ພື້ນທີ່ນີ້ສໍາລັບການປູກຜັກໃນຊ່ວງລະດູແລ້ງ ແລະ ໜອງລ້ຽງປາໃນຊ່ວງລະດູຝົນ.

ຕໍ່ດ້ວຍບ້ານ ແສນພັນ ປະຊາຊົນບ້ານນີ້ມີຊື່ສຽງ ແລະ ເປັນທີ່ຮູ້ກັນດີໃນເລື່ອງທັກສະການເກັບເສດໂລຫະ ຈາກສົງຄາມ ພວກເຂົາຂາຍເສດໂລ​ຫະເຫຼົ່ານີ້ໃຫ້ກັບຊາວຫວຽດນາມເພື່ອຫາລາຍໄດ້ເພີ່ມພຽງເລັກໜ້ອຍ. ທ່ານກໍສາມາດຍ່າງເລາະຫຼີ້ນຕາມບ້ານຮ່ວມກັບຜູ້ນໍາພາທ່ຽວບ້ານ ເພື່ອທ່ຽວຊົມເບິ່ງສິ່ງເສດເຫຼືອຈາກສົງຄາມທີ່ໄດ້ນໍາກັບມາໃຊ້ໃໝ່ເປັນຕົ້ນແມ່ນ ເຮືອ, ກະຖັງ ຫຼື ຮາງປູກຜັກ, ຂັ້ນໄດເຮືອນ, ແປ້ນເຮືອນ ແລະ ສິ່ງອື່ນໆ ອີກ ທີ່ເຮັດຈາກຊາກລະເບີດ ແລະ ຊີ້ນສ່ວນຂອງເຮືອບິນສູ້ຮົບ.

ເດີນທາງຈາກບ້ານ ໜອງບົວຕາມເສັ້ນທາງປະຫວັດສາດໂຮຈິມິນ ແລະ ຈ້າງຜູ້ນໍາພາທ່ຽວທ້ອງຖິ່ນໃນບ້ານ ໜອງບົວ ເພື່ອນໍາພາໄປຕາດສອງຊູ້ທີ່ຕັ້ງຢູ່ໃນເຂດພື້ນທີ່ຕີນພູເຈື່ອງ ການເດີນທາງຈາກບ້ານຜ່ານທົ່ງນາໃຊ້ເວລາປະມານ 30 ນາທີກ່ອນເຖິງຕາດສອງຊູ້ ເຊິ່ງເປັນນໍ້າຕົກຕາດສູງ 20 ແມັດມີນໍ້າໄຫຼຕະຫຼອດທັງປີຊ່ວຍໃຫ້ທ່ານຮູ້ສຶກເຢັນສະບາຍ ໃນຂະນະທີ່ເດີນທາງທ່ອງທ່ຽວ. ກ່ອນຈະໄດ້ຊື່ວ່າ ນ້ຳຕົກຕາດສອງຊູ້ ແມ່ນອີງຕາມການບອກເລົ່າຂອງຄົນທ້ອງຖິ່ນວ່າ ມີຄູ່ບ່າວສາວສອງຄົນ ມັກຮັກກັນ ແຕ່ພໍ່ແມ່ຂອງທັງສອງຝ່າຍ ບໍ່ເຫັນດີໃຫ້ແຕ່ງງານກັນ, ສະນັ້ນ ທັງສອງຄົນຈຶ່ງຕັດສິນໃຈໄປໂດດນ້ຳຕົກຕາດແຫ່ງນີ້ ເພື່ອຂ້າໂຕຕາຍພ້ອມກັນ. (ຄຳວ່າ ‘ຊູ້’ ໃນເມື່ອກ່ອນແມ່ນຄຳດຽວກັບຄຳວ່າ ‘ແຟນ’ ໃນປັດຈຸບັນ)​

ອອກເດີນທາງຍ່າງປ່າທ່ຽວຊົມທໍາມະຊາດຕາມເສັ້ນທາງສັ້ນໃນຕອນເຊົ້າ ຫຼື ຕອນແລງ (ຮອດບ້ານ ເວລາ 5:30 ເຊົ້າ ຫຼື 5:00 ແລງ) ຈາກບ້ານ ໜອງແສງໄປສູ່ຜາກຸດ ​ເພື່ອ​ເບິ່ງ​ລີງ ຮ່ວມກັບຜູ້ນໍາພາທ່ຽວບ້ານ ເຊິ່ງລະຫວ່າງທາງ ທ່ານອາດຈະມີໂອການພົບເຫັນລີງຜົມແບ່ງກໍາລັງກິນໃບໄມ້ ແລະ ໝາກໄມ້ຕາມຕົ້ນໄມ້ທີ່ຢູ່ໃນພື້ນທີ່ຜາກູດ ຫຼື ເຫັນພວກມັນກະໂດດ ແລະ ຫຼີ້ນຢູ່ຕາມຕາມກ້ອນຫີນ.